Японири Токио хулинче Паралимп вӑййисем пыраҫҫӗ. Раҫҫейӗн пӗрлештернӗ командин йышӗнче пирӗн ентешсем те пур.
РФ тава тивӗҫлӗ спорт мастерӗ Елена Иванова ҫӑмӑл атлетика турнирӗнче, 100 метра чупассинче, финала тухнӑ. Ку кӑна мар, вӑл кӗмӗл медаль ҫӗнсе илнӗ. Елена 100 метра 14,60 ҫеккунтра чупса тухнӑ. Ҫак ятпа ӑна ЧР Пуҫлӑхӗ Олег Николаев та шӑнкӑравласа саламланӑ.
Иккӗмӗш вырӑна Китайри Итин Ши йышӑннӑ. Пӑхӑр медале Ҫӗнӗ Зеланди спортсменки Даниэль Эйтчисон выляса илнӗ.
Ҫурла уйӑхӗн 7-8-мӗшӗсенче Беларуҫра хӑвӑрт утас енӗпе ӑмӑрту иртнӗ. Унта пирӗн ентеш Виктор Семенов тӗнче рекордне ҫӗнетнӗ.
Виктор Семенов – ШӖМ ветеранӗ, вӑл 72 ҫулта. Отставкӑри милици полковникӗ ӑмӑртӑвӑн иккӗмӗш кунӗнче 5 пин километра чупса тӗнче рекордне ҫӗнетнӗ. Финиша 26 минут та 27,96 ҫеккунтра ҫитнӗ. Вӑл 70-74 ҫулсенчи спортсменсемпе тупӑшса ылтӑн медаль ҫӗнсе илнӗ.
Виктор Семеновӑн медальсемпе кубоксем нумай. Вӑл 1976 ҫулта Олимп вӑййисене хутшӑннӑ, пӗлтӗр Мускавра ветерансен хушшинче иртнӗ чемпионатра тӗп триумфатор пулса тӑнӑ, 3 пин ҫухрӑмлӑ дистанцире рекорд лартнӑ.
Чӑваш Енри икӗ спортсмена допинг йӗркине пӑхӑнманшӑн дисквалификациленӗ.
Допинг пӑтӑрмахне Надежда Федорова тата Роман Георгиев ҫакланнӑ. Кун пирки Ҫӑмӑл атлетикӑн Пӗтӗм Раҫҫейри федерацийӗ пӗлтернӗ.
Спортсменсем допинга хирӗҫ правилӑн 2,2 пунктне пӑснӑ иккен. Надежда Федоровӑпа Роман Георгиевӑн спортри айӑплав вӑхӑчӗ икӗ ҫула тӑсӑлӗ. Вӗсен спортри айӑплав вӑхӑчӗ 2019 ҫулхи утӑ уйӑхӗн 20-мӗшӗнче пуҫланнӑ. Тепӗр майлӑ каласан, кӑҫалхи ҫӗртме уйӑхӗнчен Чӑваш Енри ҫак икӗ спортсмен ӑмӑртӑва хутшӑнайӗ.
Надежда Федорован специализацийӗ — вӑтам инҫӗшне чупасси, Роман Георгиевӑн – утасси.
Чӑваш Ен Ҫӑмӑл атлетика федерацийӗнче ҫӗнӗ ертӳҫӗне суйланӑ. Пӗр вӑхӑтра федерацие Валерий Иванов ертсе пынӑ. Хальхи отчетпа суйлав пухӑвӗнче ҫитес пилӗк ҫула ҫӗнӗ ертӳҫӗне суйланӑ. Федераци председателӗ пулма Шупашкарти 8-мӗш спорт шкулӗн директорӗнче ӗҫлеткен Елена Ивановӑна шаннӑ. Вӑл — Раҫҫейӗн ҫӑмӑл атлетика енӗпе тава тивӗҫлӗ спорт мастерӗ, Олимп вӑййисене икӗ хутчен хутшӑннӑ, тӗнче тата Европӑри марафон чупӑвӗнче чемпионка ята тивӗҫнӗ.
Ҫӑмӑл атлетика федерацийӗ ҫумӗнче кӑҫал пуҫласа йӗркеленӗ попечительсен канашне йӗркеленӗ. Алина Иванова ача-пӑчан ҫӑмӑл атлетикине чӗртсе тӑратас ӗмӗтлине пӗлтернӗ.
Ҫӑмӑл атлетика енӗпе 101-мӗш чемпионат та Шупашкарта иртес шанчӑк пур. Ҫакӑн пирки ҫӑмӑл атлетика енӗпе Раҫҫейӗн пӗрлештернӗ командин тӗп тренерӗ Юрий Борзаковский Шупашкарта пӗлтернӗ.
Аса илтерер, утӑ уйӑхӗн 24-27-мӗшӗсенче Чӑваш Енӗн тӗп хулинче ҫӑмӑл атлетика енӗпе Раҫҫей чемпионачӗ иртрӗ. Утӑ уйӑхӗн 25-мӗшӗнче Пӗтӗм Раҫҫейри ҫӑмӑл атлетика федерацийӗн президиумӗн ларӑвӗ иртнӗ. Унта пӑхса тухнӑ ыйтусен шутӗнче черетлӗ сезонти календарь те пулнӑ.
Чӑваш Енӗн Спорт министерствинче пӗлтернӗ тӑрӑх, 2020 ҫулхи ӑмӑртӑва йышӑнас шанчӑк икӗ хулан пур: Хусанӑн тата Шупашкарӑн.
«Чемпионата ӑҫта ирттерессине президиумӗн кӗрхи ларӑвӗнче татса парӑпӑр, – тенӗ Юрий Борзаковский. – Турнир е Шупашкарта иртӗ, е Хусанта. Хальлӗхе Шупашкар пирки шухӑшлатпӑр».
Шупашкарта турнир кӑҫалхипе ҫиччӗмӗш хут пуҫтарӑннӑ. Унччен Раҫҫей чемпионатне ҫӑмӑл атлетсем Чӑваш Ен тӗп хулине 2002, 2009, 2011, 2012, 2015 тата 2016 ҫулсенче пуҫтарӑннӑ.
Утӑ уйӑхӗн 24-27-мӗшӗсенче Чӑваш Енӗн тӗп хулинче ҫӑмӑл атлетика енӗпе Раҫҫей чемпионачӗ иртет. Ӗнер ӑмӑртӑвӑн иккӗмӗш кунӗ пулчӗ. Чӑваш Енри спортсменсемшӗн вӑл ӑнӑҫлӑ иртнӗ.
Раҫҫейӗн спорт мастерӗ Вера Васильева, тӗрӗссипе, ӑмӑртӑвӑн малтанхи кунӗнчех палӑрнӑ-ха. 800 метрлӑ дистанцире вӑл финала кӗме пултарнӑ. Ӗнер Чӑваш Ен хӗрӗ ҫав дистанцире кӗмӗл медаль ҫӗнсе илнӗ.
Вера Васильева — олимп резервӗн 3-мӗш спорт шкулӗн тата Ардалион Игнатьев ячӗллӗ Спорт хатӗрленӗвӗн центрӗн воспитанници. Пултарулӑха вӑл Раҫҫейӗн тава тивӗҫлӗ тренерӗ Валентина Давалова патӗнче туптать.
Паян Вера Васильева 1500 метра чупӗ.
Шупашкарти чемпионата, сӑмах май, ҫӗршывӑн 72 регионӗнчи спорстменсем килсе ҫитнӗ.
Чӑваш Енӗн тӗп хулинче ҫӑмӑл атлетика енӗпе иртекен Раҫҫей чемпионачӗн иккӗмӗш кунӗ ӗнер хыҫа юлчӗ. Раҫҫейӗн 72 регионӗнчен килсе ҫитнӗ спорстменсем тӑватӑ кунта медальсен 40 комплекчӗшӗн ӑмӑртӗҫ.
Ӗнер, утӑ уйӑхӗн 25-мӗшӗнче, Анжелика Сидорова хӑйӗн унчченхи рекордне ҫӗнетме пултарнӑ. Шӑчӑпа ҫӳллӗшне сикекенскер 4 метр та 86 сантиметра ҫӗннӗ. Ку кӑтартупа вӑл ылтӑн медале ҫӗнсе илнӗ.
Анжелика Сидорова — Европа чемпионки, тӗнчен икӗ хут вице-чемпионки. Раҫҫейри стартсенче Мускавпа Чӑваш Ен чысне хӳтӗлет.
Чӑваш Енӗн Спорт министерствинче пӗлтернӗ тӑрӑх, унчченхи рекорда та спорстменка Шупашкарта тунӑ. 2016 ҫулта иртнӗ Раҫҫей чемпионачӗ вӑхӑтӗнче вӑл 4 метр та 85 сантиметр ҫӳллӗшне сикнӗ.
Раҫҫей чемпионатӗнчи «ылтӑна» Анжелика Сидорова ӗнерхине шута илсен пурӗ тӑватӑ хут ҫӗнсе илнӗ.
Ҫӗртме уйӑхӗн 15-16-мӗшӗсенче Шупашкарта хӑвӑрт утас енӗпе Раҫҫей чемпионачӗ тата первенстви иртӗ. Чӑваш Ене ҫӗршыври 20 регионти 150 ҫӑмӑл атлет килме палӑртнӑ.
Ӑмӑрту Шупашкарти кӳлмекре иртӗ. Арҫынсем – 50 ҫухрӑм, хӗрарӑмсем 20 ҫухрӑм утӗҫ. Юниорсен тупӑшӑвӗ вара «Олимпийский» стадионта иртӗ. Спортсменсем 5 тата 10 ҫухрӑм утса тухӗҫ.
ЧР Спорт министерстви пӗлтернӗ тӑрӑх, кӑҫал наци первенствипе килӗшӳллӗн регионсен хушшинче «Ҫамрӑк скороход» тупӑшу ирттерме палӑртнӑ. Унта 14-15 ҫулсенчи хӗрсемпе каччӑсем хутшӑнӗҫ, пӗрремӗшӗсем – 3 ҫухрӑм, иккӗмӗшӗсем 5 ҫухрӑм парӑнтарӗҫ.
Иртнӗ ҫулта Чӑваш Енри 84 ҫамрӑк «Раҫҫей спорт мастерӗ» ята тивӗҫнӗ. Кун пирки республикӑн Спорт министерстви хыпарлать.
Ҫак йышран сумлӑ ята вун улттӑшӗ иртнӗ ҫул вӗҫӗнче илнӗ, раштаван 29-мӗшӗнче Раҫҫей спорт министрӗ Павел Колобков хушу алӑ пуснӑ. Ҫапла майпа Чӑваш Енри Дарья Александровӑпа Анастасия Ахтямова, Данила Волковпа Михаил Павлов (пауэрлифтинг), Денис Гавриловпа Александр Николаев тата Александр Сорокин (куҫсӑррисен спорчӗ), Александр Даниловпа Ксения Махнева (ҫӑмӑл атлетика), Максим Никоноровпа Татьяна Рогова (спорт гимнастики), Михаил Николаевпа Полина Норкина (ташӑ спорчӗ), Эдуард Тябов (киокусинкай), Артем Микушкин (спорт аэробики) тата Игорь Чеблуков (спорт кӗрешӗвӗ) Раҫҫей спорт мастерӗсем пулса тӑнӑ.
2019 ҫулта Чӑваш Енре вӗренекенсен хушшинче IX ҫуллахи Спартакиада пулӗ. Пирӗн республикӑра финал тупӑшӑвӗ спортӑн ҫичӗ тӗсӗпе иртӗ. Ҫамрӑксем маунтинбайк, ҫӑмӑл атлетика, сӗтелҫи теннис, триатлон, самбо, тхэквандо-ВТФ, шахмат енӗпе ӑмӑртӗҫ.
Палӑртмалла: Пӗтӗм Раҫҫейри ҫуллахи спартакиадӑна 2013 ҫултанпа ирттерме тытӑннӑ, ӑна икӗ ҫулта пӗр хутчен йӗркелеҫҫӗ. Ӑмӑрту спортӑн 42 тӗсӗпе виҫӗ тапхӑрпа иртет. 17-18 ҫулсенчи ҫамрӑксем финала лекес тесе малтан регион тата федераци тапхӑрӗсенче тупӑшаҫҫӗ.
ЧР Спорт министерстви палӑртнӑ тӑрӑх, финала пӗтӗмпе Раҫҫейри 18 пин ытла спортсмен хутшӑнать.
+3.3 °C